لەپاش چوار ساڵ لە گۆشەگیریی، عومەر ئۆجەلانی برازای عەبدوڵا ئۆجەلان چاوی بە رێبەری زیندانیکراوی پەکەکە کەوت و راشیدەگەیەنێت: سەردانەکە خێزانی بوە و خوازیاری بەردەوامی دیدارن.

عومەر ئۆجەلان برازای عەبدوڵا ئۆجالان و پەرلەمانتاری پارتی یەکسانی و دیموکراسی گەلان (دەمپارتی) لە هەژماری خۆی لە تۆڕی کۆمەڵایەتی ئێکس بڵاویکردوەتەوە: رۆژی رابردو سەردانی دورگەی ئیمراڵییان کردوە و چاویان بە عەبدوڵڵا ئۆجەلان رێبەری زیندانیکراوی پارتی کرێکارانی کوردستان (پەکەکە) کەوتوە.

عومەر ئۆجەلان بەبێ ئاشکراکردنی هیچ زانیارییەک لەسەر دیدارەکەی لەگەڵ عەبدوڵڵا ئۆجالان، ئاماژەی بەوەداوە کە دیدارەکە خێزانیی بوە و دەخوان بەردەوامیی لەو جۆرە سەردانانە هەبێت.

دیداری عەبدوڵڵا ئۆجەلان و عومەر ئۆجالان لە کاتێکدایە، 43 مانگە هیچ دیدار و پەیوەندییەک، لەگەڵ ریبەری زیندانیکراوی پەکەکە سازنەکراوە بەر لەم دیدارەش، کۆتا دیداری لەگەڵ محەمەد ئۆجەلانی برای بو لە 3ی ئازاری ساڵی 2020.