بەڕێوەبەری گشتی بازرگانی و پیشەسازی هەرێمی کوردستان رایگەیاند، چەند رۆژێکی دیکە دابەشکردنی بەشەخۆراکی ئەم مانگە دەستپێدەکات.
ئەمڕۆ پێنجشەممە، نەوزاد شێخ کامیل، بەڕێوەبەری گشتی بازرگانی رایگەیاند: “سەبارەت بە دابەشکردنی گۆشت بە نرخێکی هەرزان، کە بڕیارە لە عێراق دابەش لەگەڵ بەشەخۆراک بەسەر هاووڵاتییان دابەش بکرێت، تائێستا حکومەتی عێراق وەڵامی نووسراوەکەمانی نەداوەتەوە، چونکە دابەشکردنی ئەو گۆشتە تائێستا تەنیا بەشێک لە گەڕەکەکانی بەغدای گرتووەتەوە”.
سەبارەت دابەشکردنی بەشەخۆراکی ئەم مانگە نەوزاد شێخ کامیل وتی: “دابەشکردنی بەشەخۆراکی ئەم مانگە لە 15/1/2024، واتە چەند رۆژێکی دیکە دەستپێدەکات و هەمان ئەو ماددانە دابەش دەکرێن کە لە ساڵی رابردوو دابەشکراون”.
راشیگەیاند: “پلانی کارمان بۆ ئەمساڵ لەگەڵ حکومەتی عێراق ئەوەیە کە بەشەخۆراک وەک خۆی دابەش بکرێت، وەک ساڵی رابردوو، پێشنیاز کراوە بۆ ئەوەی پەنیر، شیر و ئاردی سفر بۆ بەشەخۆراک زیاد بکرێت، بەڵام تائێستا رەزامەندییان لەسەر ئەو پێشنیازە نەداوە بۆ جێبەجێ کردنی، چونکە دەبێت پەرلەمان و ئەنجومەنی وەزیران رازەمەندی بدەن و بڕە پارەیەکی بۆ تەرخان بکەن، ئینجا وەزارەتی بازرگانی عێراق بیداتە هاووڵاتییان”.