ئامادەکردنى: تاک

ئەڵمانیا چۆن وەڵامى هەر هەڕەشە و مەترسییەک دەداتەوە کە ئەگەر هەیە لە داهاتوودا ڕووبەڕووى ببێتەوە لەسەر هەردوو ئاستى ناوخۆ و دەرەکی؟ وەڵامى ئەم پرسیارە ستراتیژی ئاسایشی نەتەوەیی ڕوونى دەکاتەوە کە دواى چەند مانگێک لە مشتومڕ دواجار حکومەتى بڕیارى لەسەردا.
بیرۆکەى سەرەکى ستراتیژى نەتەوەیى کە بۆ یەکەمجار لە لایەن حکومەتى ئەڵمانیاوە بڕیارى لەسەر دراوە، لەسەر بنەماى ڕووبەڕووبوونەوەى هەڕەشە ناوخۆیی و دەرەکییەکان دامەزراوە، سەربارى هەڕەشە سەربازییەکان، ستراتیژەکە هێرشی ئەلکترۆنى بۆ سەر ژێرخانى ئابوورى و ڕێگرى لە مەترسییەکانى گۆڕانى کەش و هەواش دەگرێتەوە.
لە 14 حوزەیرانى 2023 ئۆلاف شۆڵتس ڕاوێژکارى ئەڵمانیا لە کۆنگرەیەکى ڕۆژنامەوانیدا لەگەڵ هەر یەک لە نالینا بیربوک وەزیری دەرەوە لە پارتى سەوز، کریستیان لیندنەر وزیری دارایی لە پارتى دیموکراتی ئازاد، بۆریس بیستوریوس وەزیری بەرگرى لە پارتى سۆشیالستى دیموکراسی و نانسی فیزەر وەزیری ناوخۆ لە پارتى سۆشیالستى دیموکراسی، ستراتیژی ئاسایشی نەتەوەیی ئەڵمانیاى خستەڕوو، کە لە مێژووى نوێى ئەڵمانیا لە دواى جەنگى جیهانى دووەمەوە بە یەکەمین دادەنرێت.
لەو بارەوە ڕاوێژکارى ئەڵمانیا دەڵێت: (ستراتیژی نوێى ئەڵمانیا پەیوەستە بە کۆمەڵێک پرسی ئاسایشەوە کە مەبەست لێی باشترکردن و بەهێزترکردنى ئاسایشی وڵاتەکەمانە دژ بە هەڕەشە دەرەکییەکان)، هەروەها لەو ستراتیژەدا ژینگەى ئاسایش شی دەکرێتەوە و لەسەر ئەو بنەمایە ڕێکارى تایبەت و پڕۆژەى پەیوەست جێبەجێ دەکات، لە لایەکى دیکەوە هێرشی ڕوسیا بۆ سەر ئۆکرانیا و هەڵکشانى چین ڕۆڵێکى گەورە دەگێڕێت لەم ستراتیژەدا.
هەر لەو بارەوە ئانالینا بیربوک وەزیری دەرەوەى ئەڵمانیا ئاماژە بە هێرشەکەى ڕوسیا دەکات و دەڵێت "ئاسایش و ئازادى لە ئاسمانەوە داناکات، ئەوروپاش لەبەردەم هەڕەشەدایە و ئەڵمانیاش پێویستە بە شێوەیەکى جیاواز خۆى ئامادە بکات کاتێک ئاسایشی ناوخۆ دەکەوێتە مەترسییەوە".
ستراتیژەکە سێ ڕەهەندى سەرەکى هەیە کە بریتییە لە: بەرگرى، بەرگەگرتن و بەردەوامى. لە بوارى بەرگریدا، بەهێزکردنى سوپا  وبەرگرى شارستانى و پاراستنى هاووڵاتییان دەگرێتەوە.
لە بوارى بەرگەگرتندا، کارەکە پەیوەندى بە بەرگریکردنەوەیە لە سیستمی دیموکراسی دژ بە هەژموونى دەرەکى ناڕەوا، سەربارى ئەوەى دەبێت ئەڵمانیا کەمتر گرێدراوى لێکەوتەکانى کەرەستەى خاو و وزە بێت و سەرچاوەکانى هاوردەکردنى هەمەچەشن بکات.
سەبارەت بە بەردەوامبوونیش، کارەکە پەیوەندى بە ڕووبەڕووبوونەوەى گۆڕانکارییەکانى کەش و هەوا، هەمەچەشنى بایۆلۆجی، قەیرانى ژینگە، بەهێزکردنى ئاسایشی خۆراکى جیهانى و پارێزگارى کردنە لە پەتا جیهانییەکان.
هەروەها لە ستراتیژەکەدا ئاماژە دراوە بە دانانى ڕێنمایی هاوبەش لە نێوان بەڕێوەبەرایەتییەکاندا بۆ ڕووبەڕووبوونەوەى ئاڵنگارییەکانى بوارى ئاسایش و هاوکارى لە نێوان حکومەتى فیدڕاڵی و حکومەتى ویلایەتەکان.
حکومەت لە ستراتیژەکەدا کۆمەڵێک ئامانجى داناوە وەک پێویستى بەهێزکردنى بەرگرى تەکنەلۆجی لەسەر ئاستى ئەوروپا، بەهێزکردنى ڕووبەڕووبوونەوەى کارى سیخوڕى، هێرشی ئەلکترۆنى، سەربارى پێویستى هەماهەنگى بۆ ڕێکخستنەوەى بنەماکانى هەناردەکردنى چەک لەسەر ئاستى یەکێتى ئەوروپا.

خاڵێکى وەرچەرخان بۆ ئەڵمانیا

دانانى ستراتیژی ئاسایشی نەتەوەیی خاڵێکى وەرچەرخان بوو بۆ ئەڵمانیا بەو پێیەى بۆ ماوەیەکى زۆر ئەو وڵاتە پێی وابوو کە لە ئاسایشدایە و پارێزراوە لە لایەن ئەمەریکا و هاوپەیمانى ناتۆ و بە دوورە لە هەڕەشە.
لەو بارەوە ڕاوێژکارى ئەڵمانیا دەڵێت: پرسەکە تەنها پەیوەندى بە بەرگرییەوە نییە، بەڵکو پەیوەندى بە کۆمەڵێک بوارى ئاسایشەوە هەیە.
هەر لەو بارەوە کریستیان لیندنەر وەزیری دارایی ئەڵمانیا دەڵێت: "ئەڵمانیا بۆ چەندین دەیەیە لە سەر دەستکەوتەکانى ئاشتى دەژی"، بەو مانایەى تا ئێستا باوەڕ وابووە کە هیچ پێویستییەک نەبووە بۆ گرنگیدان بە پرسی بەرگرى. سەبارەت بە بودجەش، وەزیری دارایی دەڵێت کە بەشەکانى بودجە بە بەردەوامى گۆڕانکارى بە خۆیەوە دەبینێت.


سەرچاوە: D W
https://www.dw.com/ar/%D8%A7%D8%B3%D8%AA%D8%B1%D8%A7%D8%AA%D9%8A%D8%AC%D9%8A%D8%A9-%D8%A3%D9%84%D9%85%D8%A7%D9%86%D9%8A%D8%A7-%D9%84%D9%84%D8%A3%D9%85%D9%86-%D8%A7%D9%84%D9%82%D9%88%D9%85%D9%8A-%D9%85%D9%88%D8%A7%D8%AC%D9%87%D8%A9-%D8%B4%D8%A7%D9%85%D9%84%D8%A9-%D9%84%D9%84%D8%AA%D9%87%D8%AF%D9%8A%D8%AF%D8%A7%D8%AA/a-65923093?fbclid=IwAR0aoOSw2NtAG96WyL2fRYALo3uQ0Tyj9AAix2DGIHQKcmPx_46Vmi1gNJY_aem_th_Af1cxWuzOBc0WFLofiCBD65Ko_eTZeh5MFOGfthhtfRaON931eV_b_d33-akelEDj6U&mibextid=Zxz2cZ
https://www.dw.com/ar/%D9%85%D8%AC%D9%84%D8%B3-%D8%A7%D9%84%D9%88%D8%B2%D8%B1%D8%A7%D8%A1-%D8%A7%D9%84%D8%A3%D9%84%D9%85%D8%A7%D9%86%D9%8A-%D9%8A%D9%82%D8%B1-%D9%84%D8%A3%D9%88%D9%84-%D9%85%D8%B1%D8%A9-%D8%A7%D8%B3%D8%AA%D8%B1%D8%A7%D8%AA%D9%8A%D8%AC%D9%8A%D8%A9-%D9%88%D8%B7%D9%86%D9%8A%D8%A9-%D9%84%D9%84%D8%A3%D9%85%D9%86/a-65912253?mibextid=Zxz2cZ