نێچیرڤان بارزانی، سه‌رۆكی هه‌رێمی كوردستان رایگه‌یاند، ده‌بێت دادوه‌ر ئازاد بێت له بڕیاردان و پارێزراوبێت، ده‌شڵێت: “ده‌سه‌ڵاتی دادوه‌ری كێشه‌و ته‌حه‌دای زۆری له به‌رده‌مدایه”.
نێچیرڤان بارزانی، سه‌رۆكی هه‌رێمی كوردستان له كۆنگره‌یه‌كی رۆژنامه‌وانیدا رایگه‌یاند: “ئەمڕۆ سەرپەرشتیی ڕێوڕه‌سمی سوێندخواردنی دادوەر عەبدولجەبار عەزیز حەسەن، سەرۆكی دادگای پێداچوونەوەی هەرێمی كوردستانم كرد، پیرۆزبایی لێدەكەم و هیوای سەركەوتنی بۆ دەخوازم”.
وتیشی: “هاوكات پشتگیریی تەواوی خۆم بۆ سەروەریی یاسا و دامەزراوە دادوەرییەكان دووپات دەكەمەوە”.
راشیگه‌یاند: ده‌بێت دادوه‌ر ئازاد بێ له بڕیاردان و پارێزراو بێت.
باسی لەوەشکرد: دەبێت دەسەڵاتی دادوەری خۆی داکۆکی لە دەسەڵاتی خۆی بکات، کە بەیاسا پارێزراوە، دەبێت بێ ترس و بە جورئەتەوە بەرگری لە دەسەڵاتەکانی خۆ بکات.
سەرۆکی هەرێمی کوردستان راشیگەیاند: دەبێت دادگا قبوڵ نەکات ھیچ کەس و دەسەڵات و ھێز و لایەنێک بەھەر بەھانەیەک بێت دەستبخاتە نێو کاروبارییانەوە و، نەچێتە ژێر باری ھیچ ھەڕەشە و داواکاری نایاساییەوە.
