وەزارەتی دارایی و ئابوریی هەرێم ڕوونکردنەوەیەکی لەبارەی خانەنشینیی پلە تایبەتەکان بڵاوکردەوە و ڕایگەیاند، ئەو لێدوان و زانیارییانەی بەناوی “سەرچاوە” بڵاودەکرێنەوە ناڕاستن.
دەقی ڕوونکردنەوەکە:
ماوەیەكە هەندێك پەیج و كەسانی نابەرپرس، بەناوی “سەرچاوە”یەك لە وەزارەتی دارایی و ئابورییەوە، لێدوان و زانیاری ناڕاست لەسەر خانەنشینی (پلە تایبەتە) بەڕێزەكان بڵاو دەكەنەوە.
بە پێویستی دەزانین لای هەمووان ڕوون و ئاشكرا بێت، كە وەزارەتی دارایی و ئابوری دوورە لەوەی كە زانیاری لەسەر خانەنشینانی پلە تایبەت لە پەیجە بێ ناسنامەكانەوە بڵاو بكاتەوە. دیارە ئەو پەیجانەی كە زانیاری ناڕاستی لەو جۆرە بڵاو دەكەنەوە، جگە لە مەرامی سیاسی و چەواشەكاری هیچ ئامانجێكی دیكەیان نییە.
